新聞頻道 > 體育頭條 > 【轉載】抓緊機會 張煒琪加盟澳職W-League布里斯班獅吼!
對我們的專頁說讚
【轉載】抓緊機會 張煒琪加盟澳職W-League布里斯班獅吼!


【轉載文章】機會一瞬即逝,身為女足首席前鋒的張煒琪當然甚為了解。

曾經短暫外流日本,效力當時尚係日乙聯賽角逐嘅Japan Soccer School,成為第一位係日本女子足球聯賽上陣嘅女足成員,張煒琪最後因為家庭原因而無奈告別日本足壇。

正當外流發展之夢似要悄悄溜走之際,曾經奪得本地女子聯賽神射手嘅張煒琪卻憑住係全運會嘅優異演出,引黎前澳洲女子國家隊教練Hesterine de Reus注意,並引薦前赴澳洲試腳,最後更獲得澳職W-League球會布里斯班獅吼Brisbane Roar開出聘書邀請加盟,為香港女足寫下歷史性新一頁。

對於獲得布里斯班獅吼邀請加盟,任職茶餐廳水吧嘅張煒琪直言,一切仿如做夢一樣:「回想收到確認訊息果一刻,依稀記得當時係香港嘅清晨,自己睡眼惺忪翻睇電話裡面嘅短訊,收到來自獅吼教練Mel Andreatta嘅確認。Andeatta教練係訊息裡面仲叮囑我暫時唔好向外界公佈,令我無同一直係試腳一事上向我提供協助嘅Betty(香港足球總會女子足球經理黃若玲)提起……直到第二日Betty問我收到回音未,我先笑笑口講佢知!」

今夏曾經跟隨獅吼試腳四日,最終憑著上佳表現贏得一紙合約嘅張煒琪相信,自己有能力係澳職取得成功:「係果邊踢足球讓我感到快樂,給予我一種享受嘅感覺,令我自己變得更加開朗。其實早係試腳嘅時候,已經感到自己嘅體能以及技術水平,同澳洲球員相差唔遠。當時曾經參與過球隊嘅Yo-Yo體能測試,發現自己嘅成績更屬隊內中上水平;獅吼球員普遍腳下功夫係較香港球員為佳,不過佢地跟香港球員最大嘅分別,就係係練習中甚為認真,每次傳送、攔截及射門都仿如真正比賽過程,令到練習質素大大提高。」

早已係女足無役不與嘅一員,26歲的嘅張煒琪承認,語言差異或會係今次外流發展嘅最大障礙,不過佢卻堅信自己嘅努力及獅吼嘅新隊友,可以幫助佢迅速適應新環境:「最困難嘅始終係語言方面吧!自己嘅英語能力無疑係唔高,不過獅吼嘅隊友們全都對我非常友善,每當我聽唔明嘅時候佢地就會用簡單嘅英語及手勢重覆向我溝通,努力為我打破語言上嘅障礙。而且佢地並無因為我係外來人而拒我於門外,反而更加努力助我融入球隊嘅大家庭之中,就算係每次訓練前、後都會互相鼓勵,務求激勵全隊士氣。」

細細個就住係青衣嘅張煒琪,從少就已經得到家人義無反顧嘅支持去追尋足球夢,對於佢將遠渡重洋揭開足球生涯新一頁,張煒琪表示感激家人一直係背後默默支持:「一如以往,家人對於我繼續追尋足球夢都係非常支持,之前更加反問我到底仲等咩?當然要把握機會立即答應加盟!好像我之前所講,上次因為家庭因素而需要告別日本,我曾經諗過或者外流嘅機會,對我黎講已經係一個過去式,不過如今再度獲得青睞,今次更係遠赴澳職發展,對我黎講彷彿就係黑暗中有一道光門突然為我打開一樣。」

對於成為首名登陸澳職嘅女足成員,張煒琪明言了解到事情背後嘅重大意義,亦決心以行動同埋表現,為本地女足帶來更多正面嘅影響:「我了解到成為第一位投身澳職嘅女足成員,背後所蘊藏嘅重要意義,但老實對大家講,呢一切對我而言,仍然都係非常陌生……我了解到之前有好多前輩因為種種原因而需要離開足球,亦有不少年青球員到了21、22歲就因為工作而放棄繼續參與呢項運動,所以今次前赴澳職發展,我反而希望佢地可以睇到煒琪獲得嘅機會,而重燃對足球嘅希望。」

今日我地係張煒琪身上再次睇到「希望」,祝願佢係澳洲踢出女足新一頁!

#我撐女足

原文刊於香港超級聯賽 Hong Kong Premier League