新聞頻道 > 體育頭條 > 永倫新援富思覺 我打過,我真係打過!
對我們的專頁說讚
永倫新援富思覺 我打過,我真係打過!


永倫新援中鋒富思覺(Scott Vollmerich)(右一紅衫)身高達197cm,喺地下聯賽「屈晒機」!

【體路專欄】標題起到咁勁,其實筆者只係曾經喺地下聯賽交過手,被永倫新援中鋒富思覺(Scott Vollmerich)爆到體無完膚。

話說港島區有兩個以外國人同ABC為主嘅籃球聯賽,一個係Dream League,另一個係AICBL。老老豆豆,如果諗住打快樂籃球,就勸大家唔好越級挑戰,因為衝撞激烈程度相當高,即使打最低組別都未必頂得順(除非你想近距離看到Bryant Austin喺你面前Alley-oop另計)。

筆者五年前成立BromanceSport 籃球隊,舊年為挑戰一下球隊實力,決定報名AICBL聯賽,當時喺小組賽同八強,兩戰由富思覺(Scott Vollmerich)帶領嘅MS。

MS一班球員個人籃球技術並非特別出眾,但身體質素極強,幾個球員身高喺186cm以上,對我們呢種身高唔夠、體能唔夠嘅球員嚟講係極大挑戰!

第一次面對Scott Vollmerich,佢好輕鬆就轟入29分+搶走14球籃板(兩分波15射10中、罰球14射9中),帶領MS以56:53反勝我地。

經常征戰地下聯賽,也不時擔任球證嘅金嘉寶指出,Scott Vollmerich近一年愈來愈進步,步法靈活,衝擊力夠!(照片由巴打籃球聯賽提供)

經過第一場對決後,喺八強再次迎戰Scott Vollmerich球隊學精咗,盡可能用身體將他推出去三秒區(或者要用櫻木扯衫法),唔畀佢有輕鬆射波嘅機會。呢場比賽戰Scott Vollmerich雖然射入25分+搶走12球籃板,但命中率明顯有所下跌(兩分波20射11中、罰球9射3中),所以BromanceSport籃球隊喺幸運情況下,以57:53擊倒MS。

如果以地下聯賽的水準去評定,Scott Vollmerich肯定是A級球員,同佢交手幾次、經常征戰地下聯賽嘅金嘉寶亦有留意呢位球員嘅表現,「Scott步法靈活、有身型、小勾手好穩陣,衝擊力夠,比華人球員扎實好多。近一年我都曾經吹過佢參加嘅業餘聯賽,睇到愈來愈進步」。

當然,Scott Vollmerich並非毫無弱點,呢位後生仔比較怕對手緊迫防守,有時1米78至1米8嘅對手,都可以迫走佢。至於脾氣方面,可能因為年少氣盛,會容易同對手有爭執。

希望睇到呢位新球員喺新一季甲一上陣,為本地球壇帶來新氣息!